水草情迷

Ching, 我個缸15L水依家24W燈，應該都好夠吧！有CO2， 溫度27～30，但我D小圓葉仲好似好追光咁，一兩星期就生到上頂，而且D節好疏呀!點算好呀!

請提供你個缸既長闊高。
你支24W燈係光管定係其他燈？
係一支過定分幾支？
用左幾耐？

我個缸, 14"w x 8"D x 9"h, 15L水
支燈係用PL管的, 24W, 新買架,用架都唔夠一個月!

咁支燈應該無問題。
而有你所講既現象，我諗到既有兩個可能性。
1> 你個缸唔算好高，但係你要求高，兩個星期生到上頂唔算太快。
2> 你d浮萍放埋同一個缸，浮萍遮左一d光。

ching, 你又知我有浮萍既, 但我d浮萍己經控制在某一位置上, 而困個位下面只有石和莫c, 咁ok嗎?
我可能要求高d,因為我人哋果d每一節之間密好多架!我想睇吓仲有乜野方法呢!

你出 post 賣浮萍都想多d人睇架，咁我係其中一個囉。
理論上，光線係直射既，你有咁既想法啱晒，不過，光源射出既光線係有度角既，所以都係遮左。將d 浮萍掉左佢算喇。
ada或者其他牌子有d類賀爾蒙既野(都係肥料既一種)，對於整矮水草有幫助，上佢地既網頁睇下，或者去魚街問下 d sales。

多謝賞面!!d 浮萍掉左佢好晒!依家己經冇咗好多!
請問ada或者其他牌子賀爾蒙既野,係邊隻, 有冇名!!

魚與熊掌，不可兼得，你一係掉左佢，一係用另外一個缸養佢。
呢D類似賀爾蒙既野，我都未用過，係幾年前睇過一D文章介紹，大致係會幫助D植物生長側芽，等佢唔好博命向上生。你試下搵下ADA呀，seachem呀，翠湖呀呢類網頁睇下搵唔搵到。

SIMON CHING, 唔該晒! 另外我的紅蝴蝶生得唔夠直,彎彎曲曲咁,又有乜計呢!是缺乏了什麼嗎?

咁就真係唔知，通常缺左某一種元素會令到D葉黃呀，燶呀，厚呀，薄呀咁，影响條莖就唔多覺。會唔會係你支燈側埋一邊或者受陽光影响呢？
都係睇下其他網友有無高見好D。

我支燈的位置是對正D小圓葉同紅蝴蝶架! D小圓葉冇事，只係生得太快啫（擒晚我已剪晒佢哋再插過啦），但D紅蝴蝶就彎彎曲曲咁， 就係唔知缺左邊一種元素！我有加開鐵肥， 唔知再加鈣又得唔得呢!我CHECK過TBS有隻“水草生長激素”和“側牙激素”可能係CHING你講的類似賀爾蒙既野！唔知有冇CHING用過，成效如何呢!

紅蝴蝶係生長得好快，彎彎曲曲係因為追光，有燈照時向上，著燈前或熄燈後要睇下有冇其他光源，最常見係室內照明或係陽光反得落水晶地板、磁磚等再射入缸，紅蝴蝶向光追會灣身，久而久之變得彎彎曲曲。

我D紅蝴蝶冇生長得好快，生得好快既係小圓葉！哦！即係開燈之前，要將個缸封密變黑房？

如果證明真係好似鏍絲兄咁講，咁真係要搵D野遮遮佢，或者你既開燈時間同其他光源同步亦都得。
當然，你亦可以接受佢彎彎曲曲都得。

我梗係唔接受佢彎彎曲曲啦, 等我搵D野遮遮佢先!