水草情迷

大家好, 今日第一次上黎, 就完全比 d 蝦吸引住, 好想開始養蝦生活, 睇左情迷d post, 但係又怕會做左殺手, 所以希望各位幫小弟手, 令我可以有個好o既開始~
1. 如要一個24"x14"x18" 缸養草同蝦, 要有乜野裝備? 一般budget~ 可以列明牌子?
2. 養蝦要餵乜?
3. 開燈時間係點? 有乜影響? 開廿四個鐘係咪最好?
4. 幾耐要換水?
5. 有乜野要特別注意~
6. co2 要黎做乜? 打氣係咪即係開氣泵(養魚o個d)? 平時唔駛開?
7. 乜係陽草, 陰草? 有乜分別?
8. 水妖, 瀘桶等有何分別?

謝謝各位!!

1.瀘桶,瀘材,泥底,最好有水冷,燈
價錢就睇你畀得起幾多,平有平玩貴有貴玩
通常係幾千蚊到

2.水晶蝦專用飼料,波菜,紅蟲,基本上蝦係雜食性,乜都食的

3.冇定,照得耐d蝦既色會好D

4.通常一個星期換五份一水

5.水質同水溫

_________________
http://www.crs-hk.com/forum/index.php 一個水晶蝦的專屬論壇

開缸容易養活難...
保養亦不易...
kennethmo還是由養草開始吧
要學識養水不難 學識養魚亦不難
學識養魚才學養草.. 學識養草才學養蝦吧....
學識養普通蝦才學水晶蝦吧

我作為新手告訴你一名前輩的至理名言
所有高人都一定會認同的
對養魚養蝦養都一定的
就係 勿操之過急

買缸勿急
=====
考慮清楚先好買 買到返屋企先發現唔夠位放 唔岩心水又冇得換
考慮套裝缸係咪真係咁好先好買 好多套裝缸好好 可以隔音 但係擴展空間有限
內置過瀘十之八九都係唔夠用 想加多個瀘筒又冇窿入 加個氣泵都話冇位放
頂瀘係好用 方便清洗 但係放瀘材又唔夠多 但係得返dd位放燈 想放支12000k鹵素燈都唔得

洗缸勿急
=====
1.運送過程唔講咧 錢自己o既 魚缸自己o既 邊個最愛護過魚缸自己知 搵人送黎睇清睇楚先好收貨
小小裂痕 幾舊水都係咁先 要明白個缸係櫃度 好o既就十年八年 唔好o既一日搞掂
2.買缸回來切急 先鋪好底膠 慢慢放上缸櫃 切記要勿心急大意 否則好易爆缸 要平平均均放好放平
要明白你放上櫃好輕 睇落好似好細過 但係放左成100L水 你想郁佢轉一轉位 都好難 壓力唔平均好易由出現裂痕 到開始漏水 再到爆缸... 一晚KO
3.洗缸真係勿急 先浸佢一晚粗鹽 第二晚換缸清水用野擦下個缸 如果你想個缸懞查查就用綠色o既抹潔布抹吧 包你個缸變花面貓 搵陣d打下皮買塊好少少的棉布吧 我自己就用抹車吸水果d抹 穩陣d 要明白缸係用膠水痴的 要明白你養的魚,蝦係小朋友黎 係會咩都放入口的 佢地唔理咩都食.. 包括果d膠質野 人食左都唔掂.. 何況... 明嗎

養水勿急
=====
1. 簡單d.. 好多高手都推介 懶人必備 philips HD3802 $800左右 可以唔理晒下面2 3 ...
2. 首先明白一個道理 人活係空氣之中 如果日日都空氣質素都甚差 天文台都叫人唔好出咁多街
日日都二氧化炭過多 幅射過多.. 咩人都會病.. 所以 愛蝦愛魚日夜生活係水中 水係佢地屋企 水質有幾重要 你明白吧 做過實驗 如果你屋企有煲水的習慣 留意下個水煲入面個底有d咩 答案係會有d黃黃地o既野沈左係底 果d係金屬黎 想個缸乾淨d 如果唔用菲記過瀘 都買過平d o既過瀘吧 個缸都會乾淨d
3. 除左金屬外, 因為水喉水係由瀘水廠加左氯水先到你屋企, 所以如果你將水喉水直接去你屋企魚缸, 你屋企o既魚蝦就會直接沉係d氯水度 舉過例.. 係泳池游水你會感覺到個問題係邊的了... 有見過香港o既泳池有冇生物就知.. 除左浮係面果d.. (浮係面果d都好快會死.. ) 解決方法.. 好多建議就係買個桶 放d水放佢一晚 師兄教落因為氯氣比較輕 所以桶水放一晚氯氣會走得七七八八 咁樣水質就會好d.. 我係頭一個月玩水晶蝦都係咁樣做 未試過死傷 ^^ 應該work的
水晶蝦係所有蝦隻中對水質最敏感的 有氯水必死

放魚蝦勿急
======
1.整好晒上面d野之後..終於都開缸咧.. 要明白魚蝦生存環境咧.. 要明白如果屋企冇廁所得個木桶裝排洩物點算呢.. 人類會將佢地放出屋外.. 但係魚蝦點算呢... 明白個問題嗎? 由於時代科學進步
專家研究到個解決方法 就係叫做 硝化細菌 呢樣野佢會將水入面對魚蝦排放o既屎產生o既(NO3硝酸鹽)濃度降低 變做對魚冇咁有害o既其他物質 基本上其實魚o既排洩物都會產生呢隻菌 但係呢隻菌又好易死 有活性炭又會死d有氯又死 所以間唔中又要補充下佢 太多又唔得 夠就得的了 點解之夠呢 就係一開缸時 好多時都會個缸d水都白懞懞 你就因你o既缸水量大小去落 仲有記得過瀘器入面放d 一圈圈白色 叫做生物環的東西 呢樣野作用係可以積下d硝化細菌 咁樣個缸好快就會清架咧 養佢一個半個星期 打下皮去fs(fish street魚街)買d量度水質o既野返屋企參巧下呢度(基本上我而家只係度PH NO2 NO3 GH 買度呢四隻O既試劑都夠的了 都唔平) 各師兄的飼養環境 再考慮放唔放生物吧

唔打了... 飼養環境設置... 泥土肥料購買更換....保養都好緊要.. 控制,購買燈箱光管,亮燈時間要點... 打co2要點.. 果d慢慢再係度學吧 我係度都睇左好多個月先明明地 ...

最後啦.. 落魚蝦對水對溫......換水係一個重要課題 清洗瀘管瀘材都係一個課題.. 真係太多太多啦... 學住上面d先啦...



打左好耐.. 都冇點睇睇有冇講錯... 各位師兄再指導指導... (肯定有錯...)
呢度就係有呢樣好 各師兄都肯教肯分享 肯改正肯理論同實踐方面比意見~ 所以講錯都唔怕
哈~ 祝你早日蝦樂無窮~ 最最後提一提~~ 一切勿急 慢工出細貨~ 包冇錯~ ^^

佩服小丘兄lee份咁肯幫人既精神

_________________
http://www.crs-hk.com/forum/index.php 一個水晶蝦的專屬論壇

小丘兄, 真係多謝晒呀! 我會嘗試慢慢黎, 由養草開始!!

客氣吧...

其實真係平有平玩 貴有貴玩 ... 不過一入蝦門深似海... 樣樣野都...
養蝦可以講得好簡單 照單執藥都得
其實lokcho兄都講得好詳細了 不過如果想由入門級開始 我會咁做
1.瀘水 $800
====
買個菲記hd3802吧 目的都係整好水質 除氯之餘又保留礦物質 又唔洗整到屋企一桶一桶養水平均用成年先換瀘膽

2.缸 $200
==
買個缸 24吋 唔好太高o既缸 主要係想慳番d燈錢 平貴都有 我自己就比較喜歡玻璃較清 只要唔好係彎角就可以了 (想豪又有多餘錢 又一心一意唔會放棄養的話 ADA係高手們的選擇 有品質保證 有5年保養 不過成千銀) $XX - $XXXX

3. 燈 $200
===
入門玩的話 T8 (兩白管都夠的了 高手們會用12000k光管.. 或鹵仔, 唔平同埋會搞到水溫好熱, 有蝦友介紹 卡奇有隻24吋 亮過ada的 $200蚊左右 一般都推介用白管 會令蝦仔白d)
燈照時間唔多講了.. 不過我建議你買個時間制吧 最多以8小時為限 新開缸時頭1個月以四小時 比d莫斯生下 又冇咁易爆藻)

4. 瀘筒 $400
====
24吋缸 我諗用兩個eden501 入門級黎講..都勉勉強強都ok o既 當然最好都係e咸 不過又係一分錢一分貨 玩住先吧 兩個瀘水好處係保存硝化細菌, 清洗時每次只洗一個, 養蝦唔會好污濁 唔洗成日洗 兩個月先洗一個吧 eden501(瀘材生物環用住原廠跟盒果d先吧 都ok好用的) @$200 左右
記得要買個海棉包住吸水口 事實係會拖慢瀘筒 減低瀘筒壽命 但係養蝦冇計

5.風扇 $50
====
當然... 有多餘錢就買水冷吧.. 唔洗成日加水 用風扇就會成日吹乾d水 蝦隻喜歡大約25度左右 28度以上就有生命危險

6.汽泵&水精靈 $100 & $20
========
要明白生物始終要氧氣 汽泵唔係直接泵氣入水 原理唔講了 又係一們專門學問 增加水容氧量 對蝦隻好又唔貴 想靜d買d日本仔野 幾靜幾好 一分錢一分貨
水妖(水精靈)好處係積微生物 蝦仔70%係食微生物 30%人工飼料 蝦b至愛

7.泥 @$80 (唔係好記得, 不過係平d)
==
出左隻平泥 魚情推介 唔記得叫咩名 好似叫一品...自己上去睇睇吧 如果買呢隻 你買3包 應該夠
平過ADA泥(我覺得太酸又耐清)同白倉貴泥(用緊佢隻幼泥..但我覺得太貴..)
落水及搵水時記得....搵野阻慢d水 同埋唔好沖散d泥 有蝦時更加 因為泥底好多野 會慢慢累積 一沖起d泥 d蝦又係即死

8.水草 @$50
====
買舊莫斯沈木吧.. 始終蝦仔最鐘意都係搞莫斯 (我個人覺得...對co2 光線要求唔係咁高 易生)
我覺得上網買吧 冇咁易出事 好多網友話係魚街買o既草 返到去放缸就死蝦 原因好多 唔解釋了
你係度吸收師兄d經驗吧

9.co2套裝
======
我覺得唔好落吧.. 要明白草要co2 生物唔需要.. 雖然控制話難唔難 但係話易唔易... 過量又會死蝦... 莫斯唔洗點落co2 .... 慳番樣先吧

10.補品
=====
始終養蝦 白倉貴都係名牌子
我自己就有用...
i. 白倉貴怪粉 (24吋缸...一星期落1/2匙吧 ..) $100
ii. 白倉貴微生物之素 (都係一星期落1/2吧..) $100
iii. 蒙脫石 (24吋 落4至5粒都夠的了...振興買包大大包吧..見生晒青苔懶清洗的話就換鬼左佢吧... ...唔貴) $135
iv. 竹炭 (新手唔建議用..我覺得用左又唔係差太多 基本上係用黎吸水入面唔好o既野 不過會有飽和點 過左驚你唔知 就會放唔好o既野出黎... 如果你當佢係補品 2-3個月就換吧 15蚊左右有個細o既)
v. 白倉貴白水 $110 (舊一款為黃水 不過而家唔出的了 魚情老細話 6月中有類似作用的貨品叫泰國乜乜水 ..要買的話買白水吧)
vi. Nitrobacteria硝化菌粉 (其實仲有好多名牌 不過用左好多覺得呢隻係幾好用.. 又唔算太貴 你開缸真正落水時 落小小吧 頭一星期隔日落小小 一星期應該個缸會好清的了.. 以後就換水先落小小)

11.飼料
====
越出越多新貨...
我用緊白倉貴糧 $100
一星期餵一次日本有機小松菜 係citysuper買
香港玩家多數都係用有機菠菜 不過我睇過一d專題話菠菜鐵質對水晶蝦過高 冇再用了
切記唔好係街市買 冇品質保證之餘 有機會係混水摸珠有農藥產品 加上其放置方式問題...
去日本大型超市買吧
所有飼料都係 切記一小時內如果未食晒 就小心咁夾起佢吧 (我自己就用玻璃蓋仔 較方便)
因為飼料放置太耐 係會嚴重影響水質 你買左試紙 測試下水質就知

後記
===
開缸頭果陣 可以換密小小水 兩至三日換一次1/5 但當你落左蝦果陣 就要唔好咧...
24吋 其實我覺得每星期換一次1/4都得的了 最好落水時度一度水溫先啦 最好就係隔十分鐘左右先落d 隔十分鐘先落d 始終寶貴水晶蝦 始終係大老細黎 水溫差異太大又係.. 要死...

開頭玩 會覺得 點解個缸咁多一條條白色透明野 缸邊又有好多一粒粒野郁
師兄有句話講得好好.. 要明白始終蝦同人生活環境不同 唔好以人喜歡同埋乾淨o既指標去睇蝦缸
一條條的白絲虫 一粒粒的水蝨 係養蝦養草必經的 水質好才會有呢d野出現

kennethmo希望幫到你以後玩蝦時 唔洗再買不必要的裝備吧

真係士別三日呀!小丘兄!!

_________________
40"x14"x16",Eheim2028x2,Mr.Aqua CO2 set,Atman PL36Wx2, AB Volcanic sand,JBL base-fertilizer,Sunon cooling fanx1(25-28C)

山坑魚大師兄 見笑咧 幫我睇下有咩講錯..
諗下諗下 24吋缸 用兩個501都唔係好夠力
再上一級果d 又貴好多
大陸野台灣野又唔係好想推介....

小丘兄寫得真好！等我幫下手：

4. 24吋缸 兩個501唔好！不如試下Tetra90。應該差不多價錢。

7.泥 好似叫"一番"。

10.補品

i. 白倉貴怪粉 (24吋缸...一星期落1/2匙吧 ..) $100
ii. 白倉貴微生物之素 (都係一星期落1/2吧..) $100

呢兩樣唔落好過！

v. 白倉貴白水 $110 (舊一款為黃水 不過而家唔出的了 魚情老細話 6月中有類似作用的貨品叫泰國乜乜水 ..要買的話買白水吧)

呢枝其實好貴！買TBS的鈣肥一樣得 參考下 http://www.ishrimp.org/?p=63

比多個FAQ參考 http://www.ishrimp.org/?p=66

_________________
www.ishrimp.org

小丘兄既無私分享

小弟佩服

兩段野加埋起碼 3000 字，要我剩打都要最起碼兩個幾鐘或以上！ 服！

_________________
Bye Bye Mash BB! 你要保重， 你永遠係我既乖BB。

好耐都無見過人打咁多字喇....真係要讚

係呀, 真係好感謝小丘兄o既意見同幫助!!

係呀, 真係好感謝小丘兄o既意見同幫助!!

其實真係有錯
好多都係個人感覺...

莫斯始終係草 養得靚始終要co2...
好多玩莫斯師兄都係話要強co2

不過我覺得養蝦第一的話.... co2....真係唔好落.....諗少樣令蝦隻死亡原因