水草情迷

前言：
有網友知我用依盞燈，PM問我好唔好，反正都係答，其他網友可能都有興趣知，就以一個用家身份公開咁答。

背景：
MG有一系列套裝鹵素燈，由國內生產，可參觀公司的網頁：
http://www.chuangxing.com.cn/eBusiness/ ... oductid=25

為何用佢：
由一個氣泵一塊隔屎板開始養魚到依家，由單身寡佬到成個老襯，魚缸已經唔係自己獨有，之前都係用DIY鹵仔，覺得至梗要係個膽，個殼冇乜所謂，不過DIY得好肉酸，祗可以著到，外觀簡直係核突。早排搬屋，老婆要d野企理d，所以換套燈，由於經濟有限，歐洲貨祗可遠觀，國貨係經濟範圍下既唯一選擇，所以用左佢。

用後感：
我盞燈用左半年左右，大致上做到佢既功能，遠睇都幾型仔。近睇d接口比較差，部份用料比較單薄，安拆時要好小心，爛左都唔知有冇得配。

直望幾好，加左個擋，令到盞燈冇咁熾眼，如果個擋可以較角度更好。(可以自己加牙籤攝住)


散熱唔錯。


吊天花個位係成盞燈最大既敗筆，穿威也個位側埋一面，令到盞燈有d斜，要較好耐先較到同缸面接近90度。(90度即係燈光直射落缸底，太斜即係射左落前面塊玻璃。)


側面底塊膠條係用黎頂住塊玻璃，換膽時要除左佢，d駁位麻麻，好單薄，安拆時再特別小心。

後記：
國貨我都用唔少，同其他國貨一樣，一個平字，模仿性強，但要有心理準備唔會十全十美，冇大問題已經可以收貨，始終要將貨就價。國貨又似乎冇乜銷後服務，如果件貨有乜冬瓜豆腐，分分鍾要成件報銷。
可能對於品質監控唔係咁好，真係要講彩數，同一牌子、同一型號，評價可以差天共地，有人話用幾日就玩完，有人話用幾年都冇事，平均你預半年至兩年左右罷。對於一d買唔起貴野或者唔想投資太大既人，國貨可謂別無他選。
依盞燈近一個月，隻牛開始耐不耐有滋滋聲，都幾嘈下，拍下佢又冇聲。唔知其他網友有冇這問題？

想請教一下用了HQI後室內溫度是否比用T5HO熱很多, 另HQI下之魚缸色會不會很黃, 觀感沒T5HO 65OOK的好看.

室內溫度唔會有多大影響，或者講唔會大到你感覺得到，試想想係廚房開左焗爐，行遠ｄ都唔會感覺到有溫差。
反而魚缸內ｄ水確實會比T5HO熱很多，所以夏天用HQI多要用水冷降溫。
黃唔黃要睇鹵膽既ｋ數，肯花錢既一般都會用6500k膽，有白雪雪既觀感，$2xx打上。平d既會用5200k膽，有少少黃，$200樓下有交易。
附圖係用上兩支6500k既eye膽。