水草情迷

由於三角莫絲面層光禿禿，懷疑係嗰三隻豬咁肥嘅SEA做嘅好事；上迷情問過，Andy Kwong 都話極有可能(sorry Andy兄，拉埋你落水)。又再忍咗嗰三條友一個星期，三角莫絲更禿，表面剩番黑色禿枝，肉酸死！而三隻小肥豬就除咗「豐年蝦時間」，就日日夜夜伏住啲莫絲係咁「瞇」，是可忍屬不可忍，終於落女皇密令：驅逐肥豬出境！
呀，話就易，要喺有草有沈木有器材有其他魚嘅缸度捉飛狐… 唉有名你叫，飛狐呀…蠱惑狐狸仲會飛！所以望住三肥豬都無伸手攞網，只覺束手無策。好在我老豆老母無嘥錢供我讀書，而我嗰時嘅小學有教成語故事；於是兩日後當我坐喺魚缸前睇爆泡泡同時嘆緊清酒嗰時突然想起「請君入甕」嗰句成語，再而望吓旁邊個清酒樽... 計上心頭。
第一步，餓缸兩日。第二步，將一個透明玻璃清酒樽用繩紮實喺支長筷子度。第三步，將一粒冰豐年蝦半解凍放入酒樽，注滿水。第四步，手執筷子將酒樽放入缸中。三肥豬第一時間沖向豐年蝦粒，但被玻璃礙住，三肥豬慾壑難填(食慾)，沿住玻璃啄，啄啄啄，啄到樽口，慾令智昏，一二三，三條「捐」咗入樽… 哈哈請君入甕！我輕而易舉將筷子一提，三肥豬就被迫遷入醫生缸。
後記：昨日有條肥豬頂唔順由花園景變四大皆空景，跳樓，家中貓貓第一時間撲上，搶救無效。
又後記：三角莫絲禿枝開始生番綠芽，希望快馬加鞭變番三角啦。

_________________
花,鳥,草,魚,貓,龜

我都試過呀, 唔洗用清酒樽, 用o左生仔兜。