自從買咗個近攝環之後, 日日就企係魚缸面前不停咁影相. 影下影下, 突然發現個缸做乜多咗隻八爪魚概. 明明淡水缸, 無理由有八爪魚架. 再細心一睇, 嘩........不得了, 原來係 "水螅" . 一定係之前新草入缸時, 無好好處理帶咗入蝦缸. 本來諗住用人手去清除, 但發覺為時巳晚. 數一數, 最少都有成三十幾隻以上, 大部份係生仔兜出水口附近. 並非係魚缸玻璃面上.
立刻上網查一下除水螅方法, 見有師兄提過可用"專殺蝸蟲,水螅"概藥, 可惜唔見其他人概用後報告. 亦有師兄提過用紫銅, 但都唔知係邊度有得賣. 最後見有提過"茶籽粉"可殺蝸蟲,水螅. 諗咗一陣, 決定一試. 就走去花園街度買"茶籽粉", 見到有兩間有得買, 但都幾大包下, 成包米咁大包. 最終係間乜乜有機樓上食物鋪搵到細包D, $28蚊. 但睇個樣同師兄講概樣, 好似唔一樣. 都唔知有無買錯.
依次係我係蝦缸第二次用藥. 記得第一次用藥對付蝸蟲, 蝸蟲就殺唔死, 搞到成虹生哂啡藻, 反缸收場. 希望今次唔會啦.
按照網上師兄建議分量, 大約用咗四匙羹(奶茶羹)放入茶袋, 再放係出水口位置. 觀察咗一陣, 只係見到茶袋有少量粉末流咗入缸, 蝦仔表現正常, 唔見有飛蝦情況出現. 大約兩個鐘後, 蝦仔表現仍然正常, 係水中見到有少量白絲蟲出現(未落藥之前係無概), 留心D睇, 見到有水螅係水中飄浮, 我估藥力開始見效.
過咗一晚(大約八個鐘), 我先攞返起袋茶籽粉. 蝦缸大致表演正常, PH 上升咗 0.8 左右, 而水面有少量泡沫. 其中見到有兩隻蝦陣亡, 都預咗會有死傷. 最重要係生仔兜出水口水螅完全消失哂. 用藥成功, 放心返工.
放工返到屋企, 再觀察個蝦缸, 發現所有螺死哂, 前前後後有四隻蝦陣亡. 老實講, 蝦仔有死傷係難免, 可惜概係其中一隻係心愛概蝦. 就有少少心痛. 望佢安心上路啦. 好彩水螅完全消失哂, 總算鬆一口氣.
諗住水螅概問題巳經解決, 告一段落, 點之兩日後, 我再發現水螅, 今次唔係生仔兜附近, 而係花籃入水口位. 估計之前用藥, 令到水螅隨水飄浮, 飄到入水口位置. 我可能用藥分量唔夠, 或使用時有野做錯咗, 搞到殺唔死D 水螅. 但我巳經唔敢再用藥, 哎......只好再搵搵有無其他更好概方法去除水螅. 估唔到兩次用藥, 都係失敗收場.
登入
註冊
問答集
