水草情迷

經風水佬指點，對不起應稱堪輿大師；多年前喺近門口度放咗個魚缸，36吋「日草」套缸，養咗條花羅漢，一直咪日日灑把魚糧，三個月先換次水；得閒都有同佢傾兩句，因為佢都幾有性，認得我同隻貓，仲成日啤隻貓，好似大隻貓咁話「有種入嚟鍊過吖!」
今年五月條魚擋咗剎，躹躬盡粹，香咗，咁咪走去多年未踏足嘅金魚街盪吓。整定被鬼迷同中毒，一行行入咗各路英雄稱之為「大黑店」嗰間，擡頭一望，嘩！好靚呀！啲水草綠綠紅紅，微波盪漾；仲有嘩…咁多水泡泡…好，我要咁靚！ (註：如果嗰日水草哥哥仔啱啱清理緊個缸，被我見倒佢咁辛苦就一定無咁鬼迷。)
跟住行錯咗十步，無睇書無上網無問人無收風…不過又咁，如果有，就一定會買番條花羅漢罷啦。唯一對嘅第一步係買咗黑泥。咪以為我先知先覺，只因為貪佢深啡色，靚。
鋪咗泥等唔切咁開始插草囉。哪，自問種花都還可以，雖不至人稱嗰種「綠手指」，亦好少種死嘢；種草都唔會難過種花時…(錯!)第一個月係鍾意乜插乜，插乜死乜。最恐佈有次插咗一大片青葱的珍珠草，有日番到屋企…嘩綠豆湯呀！之後開始問下舖頭啲人，及後知道有啲係指點迷津，有啲係指你入迷津。
第二個月買咗台灣某系列嘅書睇，差啲起咗啲泥鋪水管；好在同期亦盪上咗「水草情迷」先至無番轉個缸。亦因網上收倒嘅料，拮起套缸上面啲林嬸，換濾水器(應該兩部但個框放唔落)，換燈(後來再換多一倍)，加CO2(已壞過一個錶頭)，加水泠(裝到一身都濕兼且要拆框門散熙)，加軟水樽(又多嚿水泵多個插蘇)…某日頓悟自已係喺度造緊個小宇宙，一個自給自足旣生態環境！種水草跟一般種花…唔…雲泥之別！第二個月就無綠豆湯，不過啲草都老奀茄唔多長高；都有定時定候落肥嫁啦…故然有啲草因為唔發大就有啲啡色嘅藻生喺上面變成啡色嘅草，越嚟越啡。有兩個星期我擁有一個朱古力色嘅缸！
第三個月，已成為魚街常客。某日「大黑店」水草哥哥(已知道他叫偉業)問：你有無落肥嫁？有呀，一星期兩次液肥囉，乜液肥都落齊嫁。基肥呢？唔係落液肥就得啦咩？唉，就似人淨食白飯…好又插基肥睇你哋班水草仲有乜嘢理由賴死唔生!(為所有皇冠草講句公道話，佢哋一種就生，平貴一樣。)插肥後兩日，有朝餵咗魚後唔記得開番個濾水就行人，夜晚返到屋企…嘩奶水呀！

_________________
花,鳥,草,魚,貓,龜

好精練既文筆(口語)。
一路睇一路笑。
"泡泡"係好多人既夢想/目標。
你呢幾句好到肉: "含情脈脈，微笑不語，有若初戀"

good good good!!!

_________________
AWTH-Aqua BLOG & 我的鯛琶堡全景

好好好!!

現在應該明白什麼叫做水草情迷了吧............. 情迷水草, 水草情迷!

_________________

www.cau-aqua.net


http://killieclub.hk

好精彩的口語, 好期待魚仔的另一個故事 … 好似天空小說, 成個講故佬咁呀….正。

唔知O的同胞(中國大陸 / 台灣) 的朋友睇唔睇得明呢？

多謝，太客氣嘅讚賞。
插草經歷，發自內心。
又真嘅唔記得有國內、台灣網友。不過廣東歌令到港式廣東話都好普及。

_________________
花,鳥,草,魚,貓,龜

厲害!咁好心機打咁大篇分享!!!

你經濟能力都唔錯架wow...hehe...

文筆生動,鬼馬有趣
睇落都好有錢wo 做老闆?

重記得第一次見到自已草缸有泡，就如你所說一樣「有若初戀」！之後就有好日子過，D草紅的紅、綠的綠。

厲害!咁好心機打咁大篇分享!!! x2
仲有呀, ""今次我有睇書。於是日日換水仲加埋支紫外線燈，你同我返去你呀媽度！ "" 笑到我呀. post D picture 大家分享 吓:-n05

好好睇ge文章

Post 相？嘩高難度！不怕表露年齡層吧，我來自沒有電腦的世代。唔...等我問吓啲同事啦。(我知呢個網都有教，但我真係這方面的負IQ博士。)其實有想過換咗個死人套缸，可以有個比較合乎實際需要嘅框，

_________________
花,鳥,草,魚,貓,龜

「有若初戀」！ 我都有呢種感覺 你篇文章好好笑, 但又好真情喎

好正好窩心，推返上頂先！

_________________
魚樂無窮的混養缸
viewtopic.php?f=33&t=67319

我的 60 吋 Community Tank 紀錄
viewtopic.php?f=5&t=66429

JazZ Cafe - 水族主題的蒲點
viewtopic.php?f=9&t=56663

文筆好生動,正!!!!多幾位好似樓主咁樣的網友,d同事真係以為我痴線~~~對住個mon

_________________
寶劍鋒從磨礪出，梅花香自苦寒來